Tuesday, May 20, 2008

Bas Yun Hi............

Kabhi socha ki bas yun hi..........
Hum tum saath baithe hon,
Aur achaanak baarish shuru ho jaaye,
Tum baarish ki fuhaaron se bachne ki koshish karo,
Aur main baarish ki boondon ko apni anjuri mein bhar loon,
Tum ruk kar mujhe aisa karte huye dekho,
Aur main achaanak use tumhaari oar uchhaal doon...............
Kabhi socha ki bas yun hi.................
Hum tum saath lete hon,
Tum muskuraate huye meri oar dekh rahe ho,
Aur mai apni ungliyaan tumhaare baalon mein fira rahi hoon,
Tum sharaarat se mujhe apni oar kheenchne ki koshish karo,
Aur mai koi takiya uthaakar hum dono ke beech daal doon...........
Kabhi socha ki bas yun hi...................
Hum dono saath chal rahein hon,
Bheed se alag kisi tanhaayi mein,
Tum haule se mera haath apne haath mein le lo,
Aur mai tumhaare kandhe pe sar rakh doon,
Tum apni aankhon me satrangi sapney sanjo ke rakho,
Aur mai un sapnon ko chunkar apni aankhon me utaar loon..............

2 comments:

  1. Oh ho. Kya baat hai. Aapki rachnaayein fir chaahe woh handicraft ho ya kavitaayein, unmein bakhubi khubsurati hai.

    ReplyDelete
  2. Hi Im susheela Kaphi samay ke baad ek cute sa romantic lines padhi.Its reeeeally beautiful

    ReplyDelete